Rrethoja Bizantine
Ndërtuar në kohën e Perandor Anastasit I (491-518), me origjinë nga familjet senatoriale të Dyrrahut.. Ndërtuar me material tulla e llaç, ndërtim karakteristik i kësaj periudhe, ku shënohen mbi tulla dhe vula të këtij perandori, si dhe të punishteve shtetërore, ergasterive. Bëhej rrethimi i qytetit me kurorë të trefishtë, gjatësi lineare 3,5 km, lartësi muresh 12 m., gjërësi, siç vinte në dukje historiania bizantine A.Komnena, sa për të kaluar brinjas njeri tjetrit katër kalorës. Edhe perandori tjetër me origjinë ilire, Justiniani (527-565) ndërmori vepra me karakter mbrojtës, siç njihet, Portëza, ose Porto Romano, në veri të qytetit.

Forumi bizantin (Macellum )
Ndodhet prapa Pallatit të Kulturës “A.Moisiu”, fundi i shek.V mbas K. Së bashku me
Termat publike,të periudhës romake, poshtë themeleve të pallatit të Kulturës, krijon një ansambel, një “ishull arkeologjik”, në qendër të qytetit.
Bazilika e Arapajt, trikonkë, shek.VI mbas K., përmasa 69x28 m, një nga bazilikat e mëdha të vendit, me tre nefe, atrium e kuadriportik. Ndodhet 6 km. në lindje të qytetit, në zonën turistike të Plazhit.

Torra veneciane
Ndërtim karakteristik i shek.XV, kullë e rrumbullaktë, ndërtuar me blloqe guri gëlqeror, ku ndërfuten dhe pjesë arktektonike të periudhave të më parshme, siç është blloku i gurit gelqeror me figurën e Hermesit, në funksionin e mbrojtësve të tregtarëve.
Po e kësaj periudhe është dhe Keshtjella e Sipërme, edhe këtu një kullë e rrumbullakët.

Kulla e Karl Topisë.
Njihet e tillë residenca e Princ Karl Topia, që i dha autonomi politike qytetit të Durrësit. E quante veten “Princ i Arberise”, Venediku e cilësonte “Zot i Arbërisë në viset bregdetare të Durrësit”, kurse Papa, më 1374, i njeh titullin, “Kont i Madh i Arbërisë”.

Muri Turk
I ndërtuar nga pushtuesit turk, duke e kthyer qytetin, pas vitit 1501, në garnizon ushtarak. Përgjatë këtij muri ndërtohet dhe Kulla me Sahat, dhe në brendësi të “Lagjes Kala”, ndërtohet Hamami Mesjetar dhe jashtë tij, në “Lagjen Varosh”, Pusi i Tophanes.